أغنى أغنياء العالم ... طبعا مش انا

بعد التحية و السلام

النهاردة انا حابب اتكلم على أغنياء العالم .... طب و ماله

من يومين قريت ان قائمة اغنى اغنياء العالم صدرت و يتصدرها كالعادة الرجل بيل جيتس الله اكبر عليه معاه بس مش عايزين قر و لا حسد معاه 54 مش الف و لا مليون مليار مش جنيه و لا ريال دولار

يا نهار ابيض , ده بيقولك ان دين مصر الخارجى حاجة بتاع 30 او 31 مليار و احتياطى العملة بتاعنا زيهم

بلاش كلام كبير

من الآخر يعنى احنا بننكد على نفسنا ليه بالأخبار دى

و طبعا بما انى دماغى صنعت فى مصر ضربت فى 5و نص تمن الدولار على طول

و طبعا تأكيد على موضوع ان دماغى صنعت بواسطة وزارة التربية و التعليم المصرية ضربت فى خمسة و كسلت اضرب النص

و للتأكيد ان دماغى كانت بتتبع تعليمات كتاب الوزارة بالنص رحت جايب الآلة الحاسبة و ريحت دماغى او زى ما اخوانا الشيك بيقولولى الكولكليتور و رحت ضارب لأ قصدى ضارب بجد مش حقيقى يووووووه ادينا حنبتدى نهيّس و انا مبحبش الاستظراف

راح الملبغ عملى بتاع 290 مليار جنيه

يا نهار ابيض يا بيل يا جيتس ايه ده كله ايده كله ... اهو ابتدينا نستظرف و نحسد

يعنى يجوزوا كام واحد طول ؟؟؟

يا نهار ابيض ده ممكن يجوزوا شباب باكوس كله

لأ باكوس ايه و محرم بيه و الازاريطة و بحرى كمان لأ يا عم و امبابة و شبرا و جميع محافظات "القطر" المصر

ده كمان ممكن يجوزوا شباب اثيوبيا الى بيصيعوا علينا و اهو يتهدوا و يتشغلوا بالجواز بدل ما يتشغلوا بينا

طب يا ترى بيل جيتس لو حب يشترى مصر باللى فيها ممكن الحكومة تبيعها ؟

عشان كده ان شاء الله انا نويت انى لما يقى معايا 60 مريار دورار اجوز اهل بلدى كلهم بس عايز حد يدعيلى عشان مخلعش و اطمع فيهم

^_^