أرقام أرقام أرقام

السلام عليكم

وقت طويل عدى من غير ما نتكلم اعذرونى

انشغلت فى الامتحانات و الناس اصلا مش ناقصين وجع دماغ

ندخل الموضوع على طول

فجأة اكتشفت ان احنا مجرد ارقام مش اكتر

فى نظر الجميع احنا طلعنا ارقام و بس تخيلوا من اول ما نتولد لحد ما نتكل

اول ما تتولد بيتحطلك لا مؤاخدة رقم عشان متتلخبطش مع العيال التانية الموجودين فى المستشفى

مع ان عندى احساس بعد ما كبرت و شفتهم بيعملوا الشغلانة دى ان ده كل هجص :)

و بعدين لما ربنا يكرمك و تعرف

تمشى و تيجى تروح المدارس لازم يكون سنك ما بين كذا و كذا قال يعنى داخل ال IG

مع ان اصلا المدارس كلها ملهاش اى لازمة و لو ربنا كرمك و دخلت المدرسة بقيت مجرد مجموع او رقم فى الكشف

تيجى كده بقى و تخش على الثانوية العامة تلاقى الواحد من دول يقولك انت جبت كام من غير حتى ما يعرف اسمك

ربنا سهلك ووصلت لحد سن ستاشر تمناشر سنة فى لبدنا يطلعلك يا معلم رقم قومى

و تبقى المواطن رقم كذا

و كذا و من غيره و الله ما نسوى مش الريس لأ الرقم القومى

تدخل تطعم بالرقم
تدخل الجيش بالرقم
حتى لو ربنا سهلنا و دخلنا السجن حيبقى لينا رقم

ارقاااااااااااااااااااااام كتيــــــــر قابلتنا فى حياتنا

ربنا سهلك و عديت من فخ الثانوية العامة و تيجى تخش الكلية اللى انت بتحلم بها يقولوك مجموعك يا معلم

يا جدعان ده انا جايب الدرجة النهائية فى

الأحياء و الفيزياء (تخيل) و الانجليزى و عايز ادخل كلية طب يقولوك مجموعك

طب ان ناقص فى الاقتصاد و الفلسفة و الجغرافيا ايه علاقتهم بالطب يقولك
لااااااااااااا

و العكس صحيح

تدخل اى كلية و تقضى فيها اللى ربنا

كاتبهولك فيها و تتعرف على ناس و طبعا متنساش رقم موبايلك

و رقم الجلوس و رقم الكشف و رقم مجموعتك و الفلوس اللى معاك كام و الخ الخ
هكذا ارقام الى ما لا نهاية

و تتخرج تيجى تقع و تحب واحدة و تيجى تتجوز يقولك ابوها مرتبك كام

و يحطلك رجل على رجل قال يعنى عنده ملك قارون و هو يادوبك جايب الشبشب بالعافية

الى ان نرحل عن دنيانا

فى سلاااااااام و برضه حنفضل مجرد ارقام

شفتم ازاى

اضحك علينا فى بلدنا و

مطلعناش الا شوية ارقام

عشان كده تسمع 100 ماتوا فى مستشفى و لا يهمك

و 100 تانيين فى حادث طريق و الحكومة زى ما هى

و 4000 اتشردوا و لا يتحركلهم شعرة

600 اتسجنوا عادى

و 2000 فى عبارة و فيها ايه

و 20 مصرى مسجونين فى بلد متسمعش عنها قبل كده و لا بتحترمنا
و ماله

طبعا عادى لأن فيه لسه 80 مليون مش عارفين نخلص منهم
و الحكومة مش عارفة تسربهم فين

و احنا اللى خلينا نفسنا ارقام و بس

طبعا فى ناس تانية ميهماش الا برضه ارقام بس ارقام حسابتهم فى البنوك مش المصرية لأ طبعا الى فى سويسرا

يهمه حيطلع بأد ايه من العبارة و لا ربحه حيكون كام من الصفقة دى

وطبعا الصفقات دى كلها على حساب دم الشعب المطحون

نفسى نكون اكتر من مجرد ارقام تفتكروا لو كنت ربنا كرمك و اتولدت فى اى حتة غير بلدنا اللى بنعشقها

يعنى مثلا لو اتولدت فى
اوروبا
او امريكا
او حتى نيجيريا
مثلا يعنى و قرصتك ناموسة مصرية العالم حيسكت ؟؟
و لا حيوقعوا عقوبات على مصر و السفير العلانى يحتج
و حقوق الانسان تهيج
انما لو كنت مصرى و اتقبض عليك بره
و لا حد ضايقك
و لا جماعة ايطالية قتلوك فى قلب روما
او ولاد الكلب الصهاينة ضربوك بالرصاص على الحدود
او متجوز واحدة اجنبية خلعت بالعيال
تفتكر حد عندنا فى بلدنا حيعترض و يشجب و يدين ؟
و لا حيقولهم استنوا لسه فاضل 80 ملوين خلصولنا عليهم و نخلص

لو حد عنده اجابة يا ريت يرد عليا

سلام