افتكاسة طب اسكندرية

السلام عليكم و هالو
ايه الأخبار ؟
النهارده ان شاء الله حنبتدى شوية افتكاسات على الكلياتفى بلدنا الحلوة ,
و ان شاء الله نتكلم المرة الجاية على افتكاسات جامعة عين شمس بتاعت 0900
طبعا بما ان فيه ناس ضاربين كتيييييييير موجودين دلوقتى فى دنيتنا فحنتصور الحوار ده
المشهد الأول فى المدرج
واحد ضارب قاعد مستنى المحاضرة مع صديقه برعى , الشباب كلهم نازلين كلام كأنهم مش حيتكلموا تانى : دودودودودودوىدىدى
برعى : قاعد بيراجع المحاضرة : و لما نحط السريبلم جوه الانال كانال يطلع لنا 2 امينو اسيد فحتكون الصبغة اتش اندe و هو ده تركيبة المضاد الحيوى
واحد ضارب ( تحية كبيرة جدا للبطل ده) : قاعد يفكر حيعمل ايه فى 150 صفحة اللى عليه فى الماده دى وفاضل على الامتحان يوم واحد
دكتور فى مادة الهستو او البيو او الباثولوجى او الفارما حسب ما اصحابنا فى طب عايزين يدخل و تبدو عليه تكشيرة 111 الشهيرة او هو منظره كده
الدكتور : سلام عليكم
الشباب اللى فى الصف الأول همهمهمه ( وعليكم ) اما بقية الشباب فى المدرج فولا كأن الدكتور دخل
و بدات المحاضرة:الدكتور : توداى وى ويل ديسكاس (يعنى حنتكلم النهارده على) تربتيت تربتوت الترابتيت الترابتوت
و طبعا دى المحاضرة اللى محدش فيها بيفهم حاجة و بيكمل الدكتور تربتيت الترابتوت
برعى : و يبدو عليه الاهتمام : شور يا دكتور ياس و يقلب فى صفحات الكتاب عشان يكتب ورا الدكتور
واحد ضارب يفوق فجأة : برعى برعى هو الراجل ده بيقول ايه؟
برعى : استنى شوية الكلام ده مهم
الدكتور: فحيطلعلنا من الخطوات اللى انا قلتها الترابتيت فنحط التربتيت ده على ترتوت يطلعلنا ترابتوت اكبر
الضارب : يا ابنى انت انا مش فاهم حاجة
برعى: ولا انا مش مهم تفهم المهم تركز
الضارب : يا راجل مش دى المادة اللى عندنا بعد بكره امتحان فيها بعد بكره
برعى : آه
الضارب: و أنت ذاكرت ايه؟
برعى : ما ذاكرتش غير 10 صفحات و فاضلى 140 صفحة
الدكتور: مش عايزين صوت ياض منك له اللى مش عايز يحضر ميحضرش انا مش فى ثانوى و يشاور على برعى و يقول
الدكتور اللى لابس فسدقى مقلم يقوم يقوللى التربتيت ده يطلع ايه؟
برعى يستعبط و يبص وراه قال يعنى بيدور و بعد كده يلاقى كل الناس بتبصله فيقوم : والله يا دكتور الترابتيت ده هو...............
الدكتور فى شماتة : هه يعنى مش عارف امال بتتكلم ليه و بتضيع وقت المحاضرة؟
(و يا ريت تلاحظوا كل الوقت اللى بيضيع ده )
الدكتور : الدكتور اللى جنبه (و يشاور على الضارب) اللى لابس ............
ايه يا ابنى اللى انت لابسه ده ؟ طبعا الضارب عامل نفسه مش سامع و مازال يفكر فى 150 صفحة القدام و عليهم ال20 صفحة بتوع المحاضرة )
الدكتور قوم يا ابنى قوللى الترابتوت اللى بيبقى مع الترابتيت يطلع ايه :
الضارب : هه ؟
الدكتور : الترابتوت يا ابنى معقولة متعرفوهوش , امال دخلتوا طب ازاى؟
و بعد مايقوم عشرة كده و يضيع نص المحاضرة يقول الدكتور مين عارف؟
فمحدش يرفع ايه , فيختار واحد من اللى بيقعدوا ادام فيقوله : والله يادكتور الترابتيت ده فى اعتقادى هو الترابتوت
الدكتور وهو فرحان: ايوة صح , نكمل المحاضرة و بعد عشر دقايق يقول ثانك يو يعنى المحاضره خلصت .
المشهد التانى الدكتور قاعد مع شوية دكاترة فى مواد تانية
( و نتخيلهم دكتور هستولوجى و دكتور بيو و دكتور اناتومى و دكتور فارما )
دكتور الهستو: منورين العايل دى مش عارف دخلت طب ازاى ؟
دكتور البيو : ولا يهمك بكره نعلمهم الأدب
دكتور الاناتومى بيفكر فى الكورسات : طبعا لازم يتربوا
دكتور الفارما: يا رجالة فى ناس من عندكم بتقطع عليا و بتحاربنى فى رزقى يعنى ايه دكتور اناتومى يدى فارما ؟
دكتور الهستو : معلش معلش دلوقتى نحطلهم قبل الامتحان يوم واحد ولا يوم و نص ؟
دكتور البيو: كفاية نص يوم
دكتور الاناتومى : المواد تقيله خليها يوم ونص
دكتور الفارما: يا ريت يا اخوانا نتوصى بالعيال دى عشان الرزق يزيد و نعرف نشتغل بقى
دكتور من الدكاترة اللى قاعدين: اطمن اطمن انا لسه كنت عندهم دلوقتى و اتأكدت بنفسى انهم مش فاهمين حاجة و مش حيلحقوا يذاكروا
الدكاترة كلهم فى سرهم: اشطة يعنى الكورسات حتشتغل على ودنه و حنسترزق
و يضحكوا ضحكة غبية
بس تجيلهم فكرة فيها خير تقولهم : و العيال الغلابة دى حرام عليكم......
فيردوا كلهم فى نفس واحد على الفكرة و هما متضايقين : اعوذ بالله من الشيطان غلابة ايه بلا ارف امال حناكل عيش منين الواحد ساعات بتجيلوا افكار غريبة
المشهد التالت فى لجنة الامتحان
الضارب يقرا القرآن كله و يكلم نفسه : يا رب يا رب العلم دى بتستعبط والله نص يوم على 150 صفحة ؟
و يستلم ورقة الأسئلة و يبص : يا نهار اسود مش عارف احل مش عارف احل
السؤال الأول من فوائد الترابتيت اللى الدكتور مقلهاش فى المحاضرة
السؤال التانى اذكر وظيفة واحد للترابتوت لما يبقى مع الترابتيت
السؤال 60: قول كل التربتيت اللى الدكتور ماقالهاش
و يستمر الامتحان و ما زال كل الترابتيت و الترابتوت و فجأة
المراقبين بيلموا الورق اصل الوقت كان نص ساعة بس
____________________________
يا ترى المشكلة فى الضارب اللى مبيلحقش يذاكر و بيؤجل مذاكرته
و لا فى الدكاترة اللى عايزين بسترزقوا
ولا فى برعى؟
ياريت تقولولى الحل عشان انا تعبت :)

اسمه مهند يا حبيبى

اسمه ايه يا انسة ؟ اسمه مهند يا حبيبى
هكذا كانت اول جملة فى لقائهما الثانى , و هكذا تسبب هذا "المهند" بفشل خطوبة صديقى , جلس معى يشكو الى و بيقوللى :
تصور يا ضارب تصور يا ضارب تسيبنى عشان واحد اسمه مهند
الضارب: معلش يا جعيدى الواد باين من اسمه مش زيك .
جعيدى : طب و أنا مالى ده انا كان نفسى أسترها و جايبلها مطرح بعفشة ميه و مطبخ و اودة نوم و صالة , مهند ده جابلها ايه أحسن منى ؟
الضارب : يا جعيدى ابوس ايدك افهم مهند ده ....
جعيدى مقاطعا : و دينى تلاتة بالله العظيم الواد ده ميطلعلوش صبح
الضارب : ياجعيدى.....
جعيدى: انت حتجف (حتقف) فى و شى ياض يا ضارب انت و لا ايه ده انا راجل مصرى و دمى حامى و بعدين ماله اسم جعيدى ؟
الضارب : يا جعيدى أنت مش لوحدك فى الهم الرجالة العرب كلهم بيعانوا من الواد ده
جعيدى : واه واه واه ليه ؟ هو الواد شكله عامل ازاى؟ بيكسب كام فى الشهر ؟ أحسن منى فيه ايه الواد ده منين ؟
الضارب: من تركيا
الجعيدى و قد انتابته ثورة عارمة واه واه واه مش مصرى اياه ؟
الضارب :لأ
الجعيدى : بقى انا فرعون الصعيد و الجاهرة (القاهرة) و الصحراوى ييجى واد تركى يغلبنى و يطير البت اللى انا جعدت اسبلها و اجسملها (اقسملها ) انى بحبها ماشى ياض يا ابن ........ و الله ياض لأوريك اما خليت حريم تركيا يحلفوا بالجعيدى واللى عملوا فى رجالتهم
و فجأة اذ لم اجده أمامى , و فجأة اذ علمت ان الجعيدى قرر ان بجتل (يقتل) مهند عشان يدفع العاااااااااااار عن العرب.
المشهد الثانى ( جعيدى فى مطار القاهرة)
الجعيدى : سلام عليكم يا بيه
الضابط: اى خدمة
الجعيدى : طب رد السلام يا باشا
الضابط: هو احنا هنا جايين نسلم على بعض , اخلص عايز ايه يا بلدياتنا
الجعيدى: كنت عايز أسافر تركيا
الضابط : أول طيارة على اليمين و السواق واقف بره تبقى تديله الأجرة و انت طالع
الجعيدى : طب سلام عليكم
الضابط استنى يا جدع انت , انت شكلك غبى انت رايح فين ؟
الجعيدى : رايح اعمل اللى حضرتك قولتلى عليه
الضابط : مش بقولك غبى يالا ياض امشى من هنا و رينى عرض اكتافك مسعود و عوض (اتنين مخبرين مليانين شوية ) خدوا الجدع ده من هنا
الجعيدى : يا بيه يا باشا انا رايح ادافع عنكم يا بيه انى لازم اجتل مهند يا بيه (يلقوا به خارج المطار)
الضابط: جتجم الارف مهند ايه ده اللى تقتلوه بطلوا حقد بقه
المشهد الثالث (الجعيدى قاعد معايا على القهوة و هو متبهدل و يبدوا عليه اثار الترحيب به فى المطار)
الضارب : معلش يا جعيدى اهو علقة تفوت ولا حد يموت
الجعيدى : واه واه
الضارب : يا عم خلاص بقى ما انت مش عايز تسمع من الصبح مهند ده ...
الجعيدى : واه واه الحكومة واجفة معاه مسنود ابن ......
الضارب : واجفة معها ازاى يعنى يا أخ جعيدى
الجعيدى : خايفين عليه منى و منعونى من السفر بعد ما كان السواق بتاع الطيارة واقف مستنينى
الضارب فى سره: لا حولا و لا قوة الا بالله الواد اتجنن
الجعيدى : يا مين يجيبلى صورته الواد ده
الضارب : صورته ادامك يا جعيدى متعلقة على اعلان السيراميك و على اعلانات التويلت لا مؤاخذة
الجعيدى : واه واه البت خطيبتى تجصد أستاذ مهند خطيب نور
الضارب : نعم يا جعيدى
الجعيدى : بس ده مرتبط يا ضارب والله انا لسه شايف الحلجة الاجنبى امبارح و كان عنده خلاف مع نور هو عشان متخانج مع جماعته يتشطر على جماعتنا؟
الضارب : اتنيل بقى روح دارى خيبتك
الجعيدى: بتجول ايه عاد؟
لضارب: بص يا جعيدى هى دى سنة الحياة ده واحد ربنا اداله شعرتين صفر و عينين خضر بقى ياخد الوف و الوف عشان يطلع يتكلم على التواليتات و الصابون و السيراميك و الذى منه و البنات معجبة بيه و مش حاسة بالنعمة اللى ربنا ادهالهم اللى هما احنا لا مؤاخذة.
يعنى انت مثلا يا جعيدى اخرك يعلقوا صورتك فى اودتك انما ده بسم الله ماشاء الله صورته اتعلقت على السيراميك اوعدنا يا رب .
ارزاق يعنى يا جعيدى فيه واحد ابوه ريس ممكن يبقى ريس ......
و فجأة لقيت الجعيدى ورواد رواد القهوة المحترمين واقفين حواليا و لقيت القفا اللى باخده كل مرة نازل عليا طراخ يخربيتك يا جعيدى انت طلعت مخبر؟؟؟
^_^

1234567890 (و من السياسة ما اضحك)

1234567890

(الجزء الثانى )
ومن السياسة ما أضحك

حنكمل مع بعض أخبار الحاضر عشان نقدر نتوقع أخبار المستقبل
الأخبار السياسية
-أكتر خبر محلى بيستهلكوه اليومين دول أن الريس بينفى التوريث و نجل الريس بينفى التوريث
و اشتهرت جملة

مصر مش زى سوريا

ما علينا بكرة الأيام تورينا و نشوف مع انى حاسس انى مصدق الريس وممكن المخلصين لمصر يعملوا كده بعد عمر طويل ان اشاء الله , رغم ايمان الحكومة المصرية بتداول السلطة

-خبر تانى بيتقال عمال على بطال أن القوات الأمريكية حتنسحب من العراق و أفغانستان و الديموكراسى حتنتشر فى المنطقة و سمعنى أجدع سلام لماما امريكا و الديموكراسى و الدولار و توم كروز و سندوتشات الهوت كلب و البترول العراقى
و طبعا لازم فى وسط دوشة الديموكراسى شوية عرب يطلعوا يعملوا دوشة فيطلعوا يقولوك نحن ضد تكسيم العراق لأ يا راجل لأ صعبت
عليا ماشى يا عم مش حنكسمها بس هو انت جاى تتكلم دلوقتى بعد ما الفاس وقعت فى .......... يا أخى روح دارى نفسك احسن

-الخبر التالت : انباء عن المصالحة العربية العربية بين دول الاعتدال و دول الممانعة .....
انباء عن قرب المصالحة الفلسطينية و تشكيل حكومة وحدة وطنية
طب أنا حأسألكم سؤال بالذمة ده منظر خبر يتقال؟ طب و المذيع اللى بيقول الخبر مبيضحكش او بيكون ماسك نفسه؟
طب حضرتك لما تشوفه ايه احساسك لما تلاقى نفسك بتتكلم عربى و الناس الاجانب بيقولوا عليك ارابيان؟
مش بتكون مكسوف من نفسك؟ قول متتكسفش ده زمن ايه ده اللى العرب عاشينه؟
رغم انى مش ناصرى لكن تخيل اصل انا ضارب) عبدالناصر ربنا رد فيه الروح كان حيعمل ايه؟
اقولك كان حيقول الموت أرحم يارب !
والله رئيس السودان اللى طالع يرقص و مرركب شوية ريش على راسه و بيقولك :الزودان لا تأترف (تعترف) بالمحكمة الدولية
يا رااجل يعنى هما مش حيعرفوا يجيبوك؟ ما تأترف ولا متأترفش الزودان حرة , لكن جرب كده تطلع بره السودان و شوف مين اللى حيأترف انه عمل جرائم ضد شعبه و تسبب بأن يكون مصير بلده متوقف عليه, يعنى الأخ لو اتقبض عليه خلاص فركش يا عم و ماما امريكا تدخل تفض الليلة و تقول لمصر خليك فى حالك حد جه جنبك؟ و معاها الجيرل فريند ازرائيل تقولها تاخدى الجنوب ولا دارفور ؟
تقوم ازرائيل تقول اخد الاتنين ماما ماما اريكا تقولها ميغلوش عليك يا روح ماما رزقك و عليه نبع النيل نقول لأ؟

تعالوا بقى نشوف بقى شوية النكت دى حتكون عاملة ازاى سنة 2148

انا حاقلوكم ازاى الاخبار حتكون و مش حاقول رايى
- أول خبر
فخامة الملك عبدالشكور يعلن انه يؤمن بتداول السلطة لذا أعلن أن اخيه برعى هو ولى العهد بدل ابنه مدحت و ي}كد ان مصر مش زى سوريا

- العثور على كارت آثرى فى منطقة مجلس الشعب يرجع تاريخه لسنة 2009 يثبت وجود المعارضة المصرية فى هذه الفترة الزمنية و يثبت عبقرية المصرى القديم فى المعارضة حيث كتب على الكارت" انا مش موافق و حتلاقينى نايم فى المجلس" حيث كان النوم فى المجلس احد اهم وسائل المعارضة

-الرئيس الأمريكى فى خطابه الى الأمة الأمريكة يحاف يمين تلاتة انهم نفسهم يطلعوا من العراق و افغانستان ومش عارفين و يدعوا الامريكان فى المساعده فى نشر الديموكراسى و التبرع بهدومهم , و عند قيام احد المعرضين و قاله يعنى نقعد ملط يا ريس؟
رد عليه و قاله ما امريكا طول عمرها ملط ادام العالم و محتاجة هدوكم عشان تستر نفسها

-ازرائيل تعلن فى عيدها رقم 200 على تأسيسها قطع المعونة عن امريكا بعد عجزت أمريكا عن حماية اسرائيل من الارهابيين اللى بيطالبوا بتحرير اراضيهم من المحتل الاسرائيلى فى جمهورية مدغشقر
-انباء عن تشجيع الحكومة الأمريكية و الاسرائلية و الاوربية على مؤتمر قمة يدعم المصالحة العربية العربية و أمريكا تعلن -رغم ظروفها- عن رغبتها فى استضافة المؤتمر فى القاعدة الأمريكية بالدوحة
و تدعو لاحترام اتفاقية "سيب و أنا سيب" و اتفاقية " من النهاردة ياجارى انا فى حالى و انت فى حالك" بين دول المماتعة و دول الاعتدال.

-الفصائل الفلسطينية تقرر عدم المصالحة بعد مفاوضات استمرت أكثر من 200 سنة و استمرار النزاع حول من يحكم حى حي التفاح و حى الزيتون فى قطاع غزة و ازرائيل تعلن انها لن تنسحب من الضفة ولا بقية القطاع و تعلن انهما جزء من ازرائيل و معها الوثائق التاريخية التى تثبت هذا

-رؤساء جمهورية الزودان الشمالية و الزودان الجنوبية و دارفور يعلنوا الحرب على نفسهم و على حلفائهم و على اللى يقف ادامهم و اللى يتشدد لهم و على اللى عايز يعمل صلح بينهم و اعلنوا انهم بيحبوا الخناقات و اتعودوا يعيشوا و هما بيحاربوا بعض و مش قادرين يستغنوا عن بعض
و قد أعلنوا جطع (قطع) مياه النيل عن مصر عشان يوفروا ماء لأنفسهم عشان يقدروا يحاربوا بعض و قد أيدت ازرائيل هذا القرار الحكيم و اتفقت معهم على مشروع يمد اسرائيل بالماء اللى انقطع عن مصر مقابل مد الزودانيين بالسلاح
فى سياق آخر اعلن الزودانيون (السودانيين) رغبتهم فى استرداد اى ريشة فضلت من طقية الريش بتاعت البشير سنة 2009 من بعد ما تم القبض عليه متلبسا و هو حاطط رجله اليمين على حدود التشاد فى محاولة منه للهرب خارج الزودان عام 2020


و عجبى
و الخبر ده حصريا
سلالة واحد ضارب تعلن عن عدم معرفة سبب كون جدهم " واحد ضارب" ضارب فى سنة 2009؟
هو انا ليه ضربت صحيح؟

الضارب ده يطلع مين ؟؟؟؟؟؟؟؟؟؟؟؟؟؟؟؟

الضارب ده يطلع مين ؟
ولا ده كان ردى على سؤال اتسألته كتير جدا جدا
أنت مين ؟
و بعدين واحد اسمه محمود ماكس وجهلى رأى جميل جدا جدا فرديت عليه
و حبيت أقولوكم مين هو الضارب ده ؟

اولا التدوين نفسه هواية و ليس هدفا
شخصية واحد ضارب شخصية فعلا انا عملتها لسبب لأن ميكونش فى قيود لها
واحد ضارب شخصية مش هدفها التهييس و الهزار وحد ضارب شخصية هدفها النقد و مش النقد و بس لأ و بتقترح حلول و بتؤمن ان عشان نغير اللى حوالينا للأحسن لازم نغير نفسنا و لازم يغير نفسه الأول
و احد ضارب مش بيتكلم فى هزار و بس
واحد ضارب بيتكلم فى أى حاجة بس لازم عشان يتكلم فى أى حاجة يكون عنده معلومات عنها مش كلام و خلاص عشان كده كتير تلاقيه يتكلم فى السياسة و ده غصب عنه عشان بيؤمن ان كل حاجة فى الدنيا ما هى الا سياسة
و حتلاقيه بيتكلم فى الحب لأنه بيؤمن أن دى الطبيعة البشرية و ان كل انسان حتى لو كان بي}من أن الناس اللى بيحبوا تافهين حيحب فى يوم
و حتلاقيه حيتكلم فى الرياضة و بيحب التاريخ الفرعونى جدا جدا و خاصة روايات
نجيب محفوظ و عشان كده باعتبره له لمحة أدبية

ببساطة ممكن تقول انه بيشوف فى كل حاجة أحلى حاجة فيها !
بالنسبة بقى للشخصية ليه مش عايزة تعلن عن نفسها ده لسبب
ان انا لو كنت صاحبك ممكن تجاملنى و تقرالى
و لو كان واحد ضارب معروف كانت شخصيته حتعمله حدود و هو زى ما قلت مش عايز حدود لأنه ببساطة مبيحبش يكون مقيد بأى حدود يحب يكون براحته و حتى قال انه لما بدأ التدوين عشان يجربه و انه ان ممكن محدش يقراله لكن بيعمل كده عشان بيحب يعمل كده بيحب يكتب و يخرج اللى جواه من غير حدود .
و



واحد ضارب بيكره الخطوط الحمراء و الحدود ماعدا تلك التى وضعها الله لنا
عشان كده ممكن نقول أن فيه خط أحمر واحد بيحبه جدا و بيحترمه و هو الدين
لكن ده ميمنعش انه يدخل نقاشات فى الدين بس المرة دى فيه حدود الهية و مع ذلك هو متسامح لأقصى درجة مع أصحاب الديانات الأخرى لأنه بيؤمن كامل الايمان بحريتهم الشخصية فى الاعتقاد

أرجو انكم تكونوا فهمتونىانا بأقدر آرائكم كلها
و على فكرة واحد ضارب مبيزعلش من حد خالص و دى ميزة ان محدش يعرف شخصيته الحقيقية و لا بيحب الخطب اللى مالهاش معنى
بس هو رغاى حبتين
ودى مشكلته
حد يسكتنى بقى

-__^

1234567890

1234567890

الجزء الأول

ايه العنوان الغريب ده ؟ يا ترى حتطلعلنا بايه النهاردة يا مضروب دى ارقام ؟ طب و ايه يعنى؟ الرقام لو حطيناها جنب بعض تعمل لنا سنين ؟ طب و فيها ايه السنين لو بصينالها حنلاقى فيها ناس ؟ انت مجنون يا ضارب الناس لو شوفناهم حنلاقى ان لهم اراء و وجهات نظر و قضايا يا مجنون يا ضارب قصدك ايه ؟ وجهات النظر و القضايا و الأهداف بتتغير بطريقة مضحكة فى سنوات قليلة بس تقريبا فيه خبر واحد مش حيتغير كتير و اكيد لو بتحبوا الكورة حنعرفوه -__^ لأ ده انت بقيت مجنون رسمى يا ضارب (طب ما انا عارف ^_^ ) قصدى ان انا حاقرا عناوين ا الأخبار فى السنين دى تعالوا مع بعض نقرا أهم العناوين فى وجهة نظرى
و تعالوا نبتدى ب سنة 1948 و 1949
دن دن دن دن دييه دن دن (موسيقى تصويرية قبل نشرة الأخبار)
السلام عليكم


- أعلن جلالة الملك فاروق الأول ملك مصر أن القوات المسلحة المصرية سوف تدخل لتحرير الأراضى الفلسطينية المحتلة من العدو و ذلك للقضاء على ما يسمى باسرائيل المزعومة و اعتزام جلالته صلاة الجمعة فى المسجد الأقصى جماعة بعد انتصار الجيوش العربية :)

- النادى الأهلى يفوز ببطولة الدورى المصرى الممتاز بفرق 4 نقاط عن منافسه الترسانة و (جدول الدورى الممتاز موسم 1948 -1949 فى الصورة )

سنه 1949
- الحكومة المصرية تنفى علاقتها بصفقات السلاح الفاسدة التى تورط فيها الجيش فى نكبة 1948 و الملك يؤكد ان البيزنس مان اللى اكل الصفقة دى هرب لسويسرا

1952 و 1953




-قيام ثورة يوليو المجيدة للقضاء على الفساد و الاقطاعيات و تحرير الوطن و الغاء نظام الملكية و العمل على تداول السلطة
-محمد نجيب اول رئيس للجمهورية المصرية
-فوز النادى الأهلى ببطولة الدورى الممتاز بعد تصدره الجدول ب 28 نقطة بفارق نقطتين عن الزمالك

1954

- مجلس قيادة الثورة يعزل محمد نجيب عن الرئاسة و يعلن جمال عبدالناصر رئيسا للجمهورية
- فوز النادى الأهلى ببطولة الدورى تانى

1956
- العدوان الثلاثى على مصر
- و رغم كده النادى الأهلى بيفوز بالدورى

و خلال كل هذه الفترة كانت مصر تتزعم حركة المقاومة العربية لاسرائيل و توعد عبدالناصر بمهاجمة اسرائيل و اشتهر بمهاجمة القوى الكبرى و نادى بالثورات التحررية بل و دعمها

1958
- قيام الجمهورية العربية المتحدة
- كالعادة النادى الأهلى بيفوز بالدورى

1961
-سقوط الجمهورية المتحدة
- النادى الأهلى بيفوز بالدورى

1965 ل 1967
- سنوات ضياع انتهت بالنكبة فى 67
- الاسماعيلى و الزمالك يفوزوا بالدورى على الترتيب ثم توقف الدورى العام (ما لازم طبعا عشان الأهلى خسر -__^ )
1970

(عام الضباب)
-رحيل عبدالناصر و تولى السادات

1073
-نصر أكتوبر
- غزل المحلة يفوز بالدورى

1978
اتفاقية كامب ديفيد و مصرتتجه نحو السلام العادل و تعترف باسرائيل المزعومة
-الزمالك بيفوز بالدورى
1981


- اغتيال السادات و تولى مبارك
و من سنة 79 لحد 82 الأهلى بيفوز بالدورى

1984
مبارك يعلن انه يعتزم يكون أول رئيس يجلس فترتين فقط فى السلطة

__________________________________________________________________
الباقى حنتناول ان شاء الله أخبار الحاضر و المستقبل ^__^

واحد ضارب & اوباما

واحد ضارب رئيس الجمهورية
و يا ريت بلاش خبث و تفهموا العنوان غلط
ده مش خيال و لا احلام
انما دى حقيقة انا بقيت رئيس
اول ما قالولى الخبر ده قلتهلهم ده شئ متوقع امكانياتى معروفة للجميع و قلت لشعبى الضايع شكرا يا اخوانا على التصقيف الحار ده انا كنت عارف انى حاكسب انا منكم و اليكم حاوعدكم بحمامات فى الشوارع و عيش حاف و تعليم نص نص و غطيان بلاعات تسرقوها و تبيعوها و نجبلكوا غيرها و صحة ضايعة و حشيش بالعبيييييييط
يعنى حتنبسطوا و انا حانبسط معاكم
تانى يوم الصبح ماما عملتلى سندوتشات الفول اللى انا بحبها و استنيت عربية الرئاسة لما جت و طلعت عالقصر
و انا طالع عالقصر لقيت الطريق فاضى , و كان فى واحد قصير قاعد جنبى شكله راجل مهم سألته هما الناس فين ؟
قاللى فى اجازة فخامتك فعرفت ان الناس مبسوطة فحمدت ربنا ^__^ انا عارف نفسى مدلع الشعب دايما
وصلت القصر حوالى الساعة 7 الصبح رحت دخلت الحمام بسم الله ماشاء الله حمام ليسيكوا يفتح النفس , قضيت واجبى فى الحمام و طلعت (بس فى صوت انذار حرايق طلع فى القصر مش عارف ليه) ,
و بعد كده زى أى رئيس فى العالم دخلت المطبخ و حطيت سندوتشات ماما على جنب ( معلش يا ست الحبايب مش وقت الفول ) اصل انا طول عمرى بارمى السندوتشات بس متقولوش لماما احسن متعمليش سندوتشات بعد كده
فتحت التلاجة لقيت دوا كحة و دوا اسهال و طبق فول عرفت ساعتها انى فقر و نحس و عرفت ساعتها كمان انى متراقب و سألت نفسى ازاى عرفوا انى عندى اسهال؟
بعد كده رحت اقعد فى المكتب الرئاسى بتاعى و لقيت التليفون بيرن
ترررن تررررن تررررن و لقيت صوت بيقوللى : كونجراتيليشن مستر بريزدنت
رديت قلت الووو
لقيتوا بيقوللى هالو كان اى توك ويز مستر ضارب
ففهمت انه بيقصدنى
رحت قلتله ياس ياس ماى نيم از ضارب و انت يا عم الحاج راح قالللى مى نيم از اوباما
و لقيتوا بيقوللى: بالصلاتو على النبى احنا عايزين نشتغل مع بعض شغل زى الفل
, قلتله وماله مستر بريزدنت نشتغل , احنا بريزندات زى بعض و فاخمين بعض كويس
قاللى بص مستر ضارب احنا عايزين ديموكراسى فى المنطقة و مش عايزين صياعة
, قلتله الديموكراسى موجودة يا بيه و الصياعة مع الصيع سيبك انت
اوباما: نو نووى , اف يو فكرت فى النووى حطلع نووى اللى جابوك
الضارب : و مال اللى جابونى بيك بلاش قلة ادب عامة انا معيش مونى يعنى فلوس عشان افكر فى النووى انا ابقى راجل لو وفرت العيش الحاف زى ما وعت لشعبى
اوباما: , يو لازم تحترم و تريسبكت جيرانك
الضارب: دول اخواتى يا بيه لازم احترمهم
اوباما: ضارب بليز ركز معايا , ان اقصد ازرائيل
الضارب: يا بيه ازرائيل مين , قصدك اسرائيل مالها يا ننوس عين مامتك؟
اوباما : بليز متجيبش سيرة المازر بتاعى
الضارب فى سره : ما انت جبت سيرة اللى جابونى كلهم من شوية (جتك الارف) و بعد كده علينت صوتى : ياس ياس شور المازر بتاعك تقعد على راسى من فوووووووووووووق , انت عيزنى اعمل ايه فيها قصدى فى ازرائيل ؟؟
اوباما: تكافح الارهاب ضد هؤلاء المساكين و توقف تهريب اسلحة الدمار الشامل لخماس و تكفل كل المعابر اللى بيهربوا منها علب السردين عشان بيعملوا منها اسلخة دمار و عايزك كمان تكبض على الناس الوخشة اللى ضد الديموكراسى و بتشتم اميريكا
و عايزك كمان مستر ضارب توطد علاقات الصداقة و الاخوة مع ازرائيل و تبعتلهم جاز عشان يعرفوا يخلصوا المنطكة من الارهاب !
الضارب فى استعباط : يظهر ان فى وش و السكة بتقطع تك تك تك تك الو واشنطن يا ابنى
محل الكلب السوخن اللى جنب البيت الأبيض ناديلى البريزيدنت بتاعكوا او ادينى البيت الابيض ايوة انا مستر ضارب
اوباما: بليز بليز خليك معايا يا ضارب انت بتروح فين ,
الضارب : انا هير يا عم كمل
اوباما: بليز يو شود تحترم البلاك اللى زيي ان يور كونترى و الا و ديموكراسى امك اطلع عينك فى اوروبا و الأطلنطى
قولتلوا يا مستر بريزدنت احنا 99% بلاك و سود و سمر و بعديمن مالنا ومال اوروبا ؟
اوباما: سورى ضارب انا كنت باكلم مستر ساركوزى
اوباما: و متخليش فى اضهاد و لازم يكون فى اخترام خقوق انسان ان يور بلد و خرية صخافة و كلام من ده احسن اخرب بيتكم و امنع الكمح و المعونة
الضارب : احنا مبنتهددش
اوباما : ان اكصد فريندز مستر ضارب و متنساش وحياة أبوك الديموكراسى تقل عليها و زود على خقوق الانسان و الكلام ده
الضارب : و بعدين عايز ايه
اوباما : نو ثينج مور اوكى يا مستر ضارب سى يو لاتر
الضارب : سى يو فى الارافة

المصرى و أعضائه 3 و الأخير

فجاه يبصوا يلاقوا الكلية اليمين داخلة عمالة تعيط
خير فيه ايه يا كلية
ايه اللى حصل
الكلية منفجرة فى البكاء : اختى الكلية الشمال اتسرقت ياااااااااااااااااااااا لهوى ياااا لهوى
العقل : احكيلنا
الكلية اليمين : الراجل الغلبان اللى احنا قاعدين جواه دخل عمل عملية اللوز فى مستشفى حكومى شالولوا الكلية الشمال و هو مش حاااسس يا لهوى
العقل : لا حول و لا قوة الا بالله
الكلية اليمين : انا مش حاقدر اشتغل لوحدى يا جدعان المية المتنيلة اللى بشربها الغلبان ده مش حاقدر عليها لوحدى
دى فيها بلاوى سودة
العقل حزينا :
اعمل ايه يعنى ايها الأعضاء الكرام
البنى آدم اللى انتوا عمالين تقطعوا فيه ده فى الول و الآخر مصرى و ابن مصرى بسماره و لونه و اكله و شربه مصرى و مكتوب علينا نستحمله
ما هو يا قلب معوش يركب تاكسى فبيركب الاتوبيس و انت يا رئه عايزاه يعفر منين و يشرب سجاير اللى بتحرق دمه غير ام 2 جنيه و نص ازاى؟
و انتى يا معده ياللى بتتبطرى على نعمة الفول و الفلافل ربنا وحده عالم بيجيبهم ازاى ده غيره مش عارف يجيبهم يعنى ما يكلش؟
و انت يا كلية لو كان معاه فلوس مكانش دخل شال اللوز فى مستشفى حكومى و كان زمان أختك معاك !
يا اخوانا احنا مش لوحدنا فى الهم ده
ده أغلب التمانين مليون بنى آدم بأعضائهم زينا يعنى يعمل ايه الغلبان ده لو انتوا قررتوا انكم تتوقفوا على العمل ؟
و كوم اللحم اللى وراه ياكلوا منين
حراااااااااااااااااااااااااااام
و فجأة تنفجر الأعضاء فى العياط و البكاء صعبان عليهم الراجل بتعهم
و فجأة الاقى كف مصرى اصيل بينزل على قفايا اصل الراجل صحا و قاللى انت بتعمل ايه ضارب يا بان الضاربين يا محنون يا ابن ..........
رحت قعدت اجرى و اجرى
بس فيه حاجة واحدة مفهمتهاش هو عرف اسمى منييييييييييين ؟!
-__^
لو عجبتكوا اكتبوا تعليق و لو معجبتكمش اكتبوا تعليق برضه و قولوا رأيكم
سلاام

المصرى و أعضائه 2

القلب للعقل و صاحبه : احنا عايزين نرتاح يا عم ده حتى و انت متنيل نايم بتحلم أحلام لا مؤاخذة بتتعبنى
العقل : ايه يا عم قلب مالك حامى علينا كده ليه؟
برررررااااااااااااااااحة
القلب : فيه ان احنا عايزين نرتاح شوية من البنى آدم اللى ربنا ابتلانا بيه
و هنا تتدخل الرئة فى الحوار و هى بتكح
اح اخ احم اح اخ احم
الله يقطعه مبيبطلش شرب سجاير و يا ريتها عدلة يا اما السجاير ام 2 جنيه و نص او سجاير فرط بيضحكوا عليه و يعبوهاله زبالة و هو مش حاسس, ده الواحدة مننا بتمر عليه بلاوى سودة
العقل بخبث: مالك يا ست رئة فيه اييييه؟
الرئه و هى متغاظة من الاستعباط : يا عم البنى ادم ده قرفنا شوفلوكوا حد تانى غيرى
العقل : خيركفا الله الشر
الرئه : مش كفاية السجاير المعفنة اللى بيشربها لأ كمان بيمشيلى و فى الشوارع يعنى ثانى اكسيد ماشى رصاص ماشى سحابة سوده مطلعة عين اللى خلفونا و ماله

يا رب يا رب ارحمنى
العقل : يا مضماظيل رئة هانم يعنى هو كان بايده؟
الرئه(و قد اعجبتها كلمة مدماظيل و هانم كعاده الجنس اللتيف) اصل يا باش مهندس عقل (و هى بتسبل) لو كانت المشكلة مشكلة سحابة عادى احنا اتعودنا لكن كله الا السجاير الكيلوبترا دى تعبانى قوى وو الله و مطلعة عينى يعنى حرام حرام اموت ببلاش
القلب مقاطعا: بص بقى يا عم الباشمهندس و ركز معايا انت لازم تفوق من السجاير و المزاج المنيل اللى سيادتك معيشنا فيه , يعنى يرضيك امابرح الاخ المصرى ده هون يجرى ورا الاتوبيس كيييلو يا يشر يا بشر عشان يركب و كرش سيادته ادامه 3 متر ليه هو انا ماكينة ده انا الحاجة الوحيدة اللى مبتستريحش جاتوا نيلة
الرئة: و الله انا خدت هباب الاتوبيس النقل العام ده كله على صدرى
المناخير متأففة : و لا الريحة جوه الاتوبيس بلا وكسة جتنا نيلة فى حظنا الهباب
و فجأة يتعالى صرييييييييييييييييييييخ
آآآآآآآآآآآآآآآآآآآآآآآآآآآآآآآآآآآآآآآآآآآآآآآه
الكل يبص للمعدة و يقولوا خيير فيه ايه؟
المعده و هى شكلها بتمر بمرحلة هضم الفول و الكشرى و الفلافل و هى اشبه بأم ساعة الولاده
انا كانوا بيقولوا عليا باهضم الزلط لكن و رب الكعبة الزلط ارحم من البلاوى اللى بتتحدف عليا كل يوم
العقل يا معدة....
المعده : اسكت يا مدهول انت اللى مودينا كلنا فى داهية
العقل بس.......
المعده : اسكت اسكت امبارح لسه هاضمة خمس ترغفة مدعومين بسلاطاتهم و مساميرهم و صراصيرهم اسكت خااااااااالص
كشفت صدرى و دعيت عليك انت و هو
العقل : احم اهدى يا معده و دارى صدرك عييب احنا فى بنى آدم محترم
فجأة يبصوا يلاقوا .................
الجزء الأخير المرةالجاية انشاء الله

الهيئة العليا لمجلس اعضاء البنى آدم المصرى

فى يوم شدييييييييد كانت الحرارة فيه عااالية و الجو حار بصيت لقيت انسان تحت الشجرة نعسان و جنبه طبق فول و فلافل و عيش بلدى كمان و كباية الشاى نصها مليان اما النص التانى فاكيييييد اكيد شربه هذا الغلبان ।
سمعت صوت زعيق و خناقات بصيت لقيت مفيش حد غيرى انا و هذا المصرى الغلبان دققت اكتر بصيت لقيت الصوت طالع من بطنه قربت ودنى ايوه قربتها (انت نسيت انى ضارب) و سمعت هذا الكلام و اتضح ان قلب هذا المصرى كان بيتكلم
القلب:لاب ضب لاب ضب اجتمعنا النهارده فى اجتماعنا اليومى لتقييم هذا المصرى الذى نقيم بداخله و مراجعة تصرفاته فى 12ساعة اللى فاتوا ما هو كل ما بينام احنا بنجتمع و ده كتير بنلاقى نفسنا فاضيين فقولنا ما تيجى نتنطط على هذا المسكين
العقل : يا عم قلب ارحمنى و ارحم هذا المسكين هو ناقصك
القلب لاب ضب لاب ضب لو سمحت يا مستر عقل مش معنى ان هذا البنى آدم المصرى موكلك عنه تنسى و تبقى زيه و تكلم بالطريقة دى
العقل : احم حم انا اسف اتفضل يا مستر قلب ( و فى السره مبقاش غير ده كمان اللى حيتنطط )
القلب : نبدأ اجتماع رقم خمسيميت مليون و نص
العقل مقاطعا: افهم بقى يعنى ايه ونص ده انا العقل ؟
القلب متأففا :يا فتاح يا عليم يا رزاق يا كريم انت حتفهم اكتر منى ده انا قلب المصرى اللى غناله و قاله انا قلبى دليلى و مقالش العقل و الاونصة و لا الكبده
المعده فرحانة: اونصة كبده هما فيييييييييييين انا زهقت من الفول
العقل : هو انت ى ما تصدقى كده على طول بلا ارف
القلب : خلونا نبدا الاجتماع
العقل : يا رب نبدأ ده قرب يصحى
القلب : و احتمال ميصحاش يا عقل لاب ضب لاب ضب
العقل مخضوض : ليه بس كده يا باشا احنا ضايقناك فى حاجة
القلب صائحا: ايوة ايوة انا متضايق مش كفاية انت و صاحبك هارينا مرمطة و شغل طول النهار و الليل احنا عايزين نرتاح شوية يا عم

البقية فى الرسالة القادمة و ان شاءالله تكون عجبتكم ..........................
مع تحيات واحد ضارب

من غير عنوان

بداية سؤال بسأله
ليه انا بدأت التدوين؟
ما انا كنت ماشى اشطة خالص على الفيس البوك؟
بصراحة شديدة انا بدأت عشان كمان سنة او سنتين يقولوا عليا المدون القدير الاستاذ كذا الكذا يمكن افلح
و عشان بصراحة لقيت ناس كتير فى مصر بتتواصل مع المدونات اكتر من الفيس توك مع انى و الله ليا سمعتى على الفيس بوك و عامل جروبات اعضائها بيوصلوا ل 100 الف انتوا مش مصدقينى؟
بس غالبا اجانب عشان كده محدش يعرفنى هنا
فانا قولت يا واد يا ضارب يا واد يا مضروب متجرب حوار المدونات ده و ماله؟
رحت رديت على نفسى و قلت عندك حق يا نفسى الامارة هو انا بادفع خمسة و تلاتين جنيه من دم ابويا و امى للراجل بتاع النت ليه.
ما اجرب و بعدين ان حاخسر حاجة؟ادينى قاعد عمال اعك و بكلم نفسى .
و رحت متخذ القرار و عملت لنفسى اكونت تانى على الفيس بوك عشان اعمل دعاية لمدونتى
و عمال ابوس ايد الناس عشان يدخلوا و يقرولى اى حاجة و اهزر معاهم بس محدش عايز يعبرنى و قعدوا يقوللى
صورتك وحشة يا واحد ضارب
رحت قلت ما لازم مش انا ضربت و بطلوا معيبة بقى على صورتى و خشوا , طب بصوا بصة واحدة !
عامة انا دلوقتى فى قمة نجاحى بقى بسم الله ما شاء الله عندى مدونة انا بس اللى بخش اقراها كل يوم
و بعمل تقييم لقالتى انها جذابة و رائعة و ممتعة و الدليل انى قاعد اقراها كل يوم اهو هو فى احلى من كده؟
ده غير انى اكتفيت بجروباتى على الفيس توك . و حمدت ربنا على نعمة انى بقيت مدون زى ما كنت بحلم .
عامة يا اخوانا مش حانختلف ده لو فيه حد بيقرا الكلام ده دلوقتى احب اقولكم ان اساعة واحدة و 44 دقيقة صباحا
يعنى انا قاعد قعدة صفا قولت اعمل مدونة و اهى ببلاش و على رأى المثل ابو بلاش كتر منه
و بما انى شديد الصراااحة احب اقول ان انا مبخافش يعنى اهى فرصة اكتب اللى انا عايزه و خلاص و نكون طلعنا بحاجة من وصلة النت اللى احنا عاملينها , يعنى يا اخوانا انا لو شطحت متعملوش زى العيال اصحابى و تقولولى سيكاها و كلام منده و هدى شوية او تخلعوا و تسيبونى
احنا مش متفقين على كده -___^
عامة ادينى بدأت التدوين و اللى حصل حصل و بكتب براحتى اهو و مش عارف فيه حد اصلا بيقرا و لا لأ بس انا ضارب فمش حتفرق معايا
اشطاااااااااااااااط
و اشوفكم (لو يه حد بيقرا) على خييييييييييييييييير و ياريت لو حد بيقرا يسيب اى تعليق ان شاء الله شتيمة بس الاقى اى فى حد سايب تعليق عشان منظر اللى خلفونى مش حلو لما اجى اقرا كل يوم مقالاتى و مالاقيش تعليق.
^___^